Taageerayaashii Reer Hargeysa Ugu Badnaa oo maanta ku Biiray Xisbiga UCID.
Hargeysa.10.March.2010-(HCTV)-Xisbiga mucaaradka ah e UCID, ayaa xaflad ballaadhan u sameeyey taageerayaashii ugu tirada badnaa ee mar qudha ku biira, kuwaas oo la sheegay inay ka soo kala baxeen labada xisbi ee kale.
Munaasibad ballaadhan oo lagu qabtay huteelka Maansoor ee magaalada Hargeysa, ayaa waxa xisbiga UCID ku soo dhaweeyey dhawr boqol oo qof oo ka soo digo-rogtay labada xisbi ee UDUB iyo KULMIYE oo ka mid ah dadweynaha degan degmada 26-ka June, halkaas oo ay ku qaabileen madaxda sare ee xisbiga oo ay hoggaaminayeen Guddoomiyaha xisbiga, ahna murrashaxa Madaxweynaha Faysal Cali-waraabe iyo murrashaxa Madaxweyne-ku-xigeenka Prof. Maxamed-rashiid Sheekh Xasan.
Guddoomiyaha xisbiga UCID Eng. Faysal Cali-waraabe oo khudbad u jeediyey dadkaas ku soo biiray, ayaa soo dhaweynta taageerayaashaas kadib, waxa uu ka hadlay xaaladihii kala duwanaa ee somaliland soo martay.
Md. Faysal Cali-waraabe waxa uu ka hadlay taariikhdii Somaliland soo martay iyo sidii ay nabada ku keentay, isagoo taa barbardhigay xaaladda waqtigan ay ku jirto Soomaaliya oo keentay in ciidammo ajaanib ah la keeno.
"Iminka Soomaaliya waxa la doonayaa in la keeno ciidamo gaallo ah iyo Maraykan ah taasna waxa keentay tallo xumadooda. Ummadda haddii uu Hoggaanku kaa xumaado waxa dhibteeda waxa tusaale inoogu filan dalka Ciraaq," ayuu yidhi Faysal Cali, waxaannu intaa ku daray, "Shacbigeenu way dadaaleen waxay dalka abuureen shirkado kala duwan oo noocyo badan, laakiin waxa meesha ka maqan doorkii dawlada. Shacbigu wuxuu leeyahay inuu cashuurtii bixiyo dawladana waxa xaq loogu leeyahay inay dhisto waxbarashadii, caafimaadkii keento, waddooyinkii samayso, biyihii keento, nabadgelyadii ilaaliso. Maanta biyo ma haysano,
iskuuladu waa lacag tayana ma laha, caafimaad hadalkiisaba daa, laydh ma lihin. Walaalayaal meelaha aanu xooga saaraynaa waa meelahaasi waa inaynu gaajada la dagaalano walaalayaal caasimadeenu miyay caasimad u egtahay. Waxaynu noqonay qoys laba carruur ah lahaa oo labadii ilmoodba ka saqiireen dawladii hoose iyo tii sareba way inaga saqiireene’e ilaahay ha u naxariisto faataxa.
Walaalayaal waxaanu doonaynaa xisbi ahaan inaanu waxaasi bedelno oo aanu ka shaqeyno inuu qof kastaaba biyo nadiif ah helo. Walaalayaal ilaa 2003-dii markii la doortay Madaxweynaha Somaliland oo dhami miyuu gaadhay dalkii oo dhan, Burco kama jiro magac ahaan uun bay maamulku uga jirtaa."
"Dawlada waxaan leeyahay diinka ayaa la yidhaahdaa indhaha ayuu wax ku koriyaaye dadku diin ma ahee gurmad bay u baahan yihiin, waxa laga sheekaynayay dhawaan meelo dalka ka mid ah markii carruurtii yar yarayd roobkii meel ay ka galaan ay waayeen ayaa digadii adhiga la jiifiyay, Walaalayaal intee in leeg ayaynu konton Wasiir masruufi karnaa muddo todoba sanadood ah ayaynu masruufaynay,"ayuu intaa ku daray.
Murrashaxa Madaxweyne-ku-xigeenka xisbiga UCID Prof. Maxamed-Rashiid Sheekh Xasan oo isna ka hadlay xafladaasi, ayaa isaguna waxa uu ku dheeraaday qorshayaasha xisbigooda u yaala ee ku wajahan horumarinta dalka, gaar ahaan adeegyada aasaasiga ah.
“Waxaan salaan kashka ka soo go’day u gudbinayaa dadkan dhalinyarada ah ee taariikhdan cusub ee astaan ah xisbiga ku soo kordhiyey, iyaddoo doorashadii ay waxyari ka hadhay, lama qiyaasi karo muhiimada ay leedahay isbeddel in la keeno, idinkuna waxaad astaan u tihiin xisbiga UCID inta doorashada ka hadhay sida ay hawshiisu u soconayso, taas oo ah in maalin walba intan in le’eg ay ku soo biiraan oo iminka dibada ka jooga,” ayuu yidhi Dr. Maxamed-rashiid.
Afhayeenka UCID Xadan Xuseen Cod-yare oo isna halkaa ka hadlay, ayaa mahadnaq ballaadhan u jeediyey taageerayaasha ku biiray, waxaannu ku dooday in xisbigoodu yahay ka keliya ee barmaamuj siyaasadeed leh, isla markaana bulshada u soo bandhiga.
Waxa kale oo xafladaasi ka hadlay dad kale oo fara badan oo isugu jiray masuuliyiin xisbiga ka tirsan iyo qaar ka mid ah dadka ku soo biiray oo ka waramay sababaha ku kelifay inay doortaan xisbiga UCID.
